कोरोनाभाइरसको महामारीले विभिन्न चाडपर्व र जात्रामा हुने पूजापाठ रोकिएकाले त्यसले अनिष्ट निम्त्याउने कतिपय धार्मिक गुरुहरूले बताइरहँदा अन्यले विषम परिस्थितिमा धार्मिक परम्परा र रीतिरिवाजलाई समायसापेक्ष बनाउन सुझाव दिएका छन्।
गएको चैत महिनामा नेपाल सरकारले कोभिड-१९ नियन्त्रण गर्ने उद्देश्यले लकडाउन गरेयता कैयौँ मन्दिरहरूमा पूजा पाठ रोकिएका छन् र सामूहिक भेला हुन निषेध गरिएको छ।
त्यसयता राजधानी काठमाण्डूमा वर्षेनि आयोजना हुने शताब्दिऔँ पुराना कैयौँ जात्राहरू कि स्थगित भएका छन् वा सीमित स्तरमा आयोजना गरिएका छन्।
दशैँ र तिहार जस्ता चाडपर्वहरू मुखमै आउन लाग्दा अधिकारीहरूले मन्दिर भित्र हुने नित्यपूजाबाहेक अरू कुनै किसिमका सामूहिक धार्मिक गतिविधिलाई खुला गर्ने अवस्था नरहेको बताएका छन्।
