सिन्धुपाल्चोकले पछिल्लो दुई महिनामा निरन्तरका ठूला ठूला बिपतिको सामना गरिरहेको छ । बाह्रबिसेको जम्बु बाढी, भोटेकोसीको बुलकोटे पहिरो, जुगलको लिदी पहिरो हुँदै दुई दिन अघि बाह्रबिसेको घुम्थाङ पहिरोसम्म आइपुग्दा १ सय १५ हताहत भए । उनीहरुमध्ये ७३ को मात्रै शव फेला पर्यो, ४२ जना बेपत्ता छन् ।
जिल्ला विपद व्यवस्थापन समितिको तथ्याङक हेर्दा बाढी पहिरोले ३ हजार बढि घर परिवारको उठिवास लगाएको छ । दुई महिनाकै बीच यति भयावह किसिमको मानविय क्षती र बिध्वंशले आज सिन्धुबासी त्राहीमाम छन् । सुन्दर भविष्यको सपना साँचेर सुतेकाहरु बिहान लाश बनेर निस्कनु पर्ने अत्यासलाग्दो अवस्था छ । ‘भागेर कहाँ जाउँ?, छैन पहिरो नखस्ने ठाउँ,’, केहि दिनअघि बाँसखर्कस्थित विस्थापितका सेल्टरमा पुग्दा जुगल गाउँपालिका २ लिदीगाउँकी सुनमायाँ लोप्चनले भन्दै थिईन् ।
