कृष्णहरि बास्कोटा
मेरा पिताश्री हरिहर बास्कोटा ९४ वर्ष पूरा गरी ९५ वर्षमा प्रवेश गर्ने क्षणमा हुनुहुन्छ । यसै सन्दर्भमा बुबाको पढाइ र जागिरका बारेमा कुराकानी गर्दा रोमाञ्चकारी स्मरणहरु हाम्रा सामु आए । जुन इतिहासलाई सार्वजनिक गर्ने ध्येयले यो आलेख तयार गरेको छु ।
केवलपुरको जन्म ः
नब्बे सालको भुइँचालो जानुभन्दा करिब ८ वर्षपहिले मेरो बुबा धादिङ जिल्लाको केवलपुरमा जन्मिनुभयो, त्यहीँ हुर्किनुभयो । पहाडी स्थान भए पनि परिवारमा केही सम्पन्नता भएकाले बुबाको बाल्यकाल सहजै बित्यो । उहाँलाई ठूलो बुबाहरुले घरमै क–ख, जोड–घटाउलगायत सिकाउनुभयो । पछि वि.सं. १९९२ मा केवलपुर पाठशाला खुलेपछि त्यहीँ प्रारम्भिक शिक्षा हासिल गर्नुभयो ।
