नेपालमा कोरोना संक्रमण रोकथाम तथा नियन्त्रणमा हुँदै आएका सरकारी प्रयास सुरुदेखि नै आलोचित बनेका छन् । लकडाउन जारी गर्दा होस् या लकडाउनका क्रममा राज्यका तर्फबाट गर्नुपर्ने तयारीका बारेमा होस्, सरकारले विज्ञहरुको सुझावलाई बेवास्ता गर्दै आफूखुशी निर्णय गरेको आरोप लाग्दै आएको छ ।
सरकारका काम कारवाहीको आलोचित हुने क्रम निषेधाज्ञा जारी गर्ने र अस्पतालमा आइसोलेसन बेड तयार गर्ने सन्दर्भमा समेत जारी छ ।
पछिल्लो समय सरकारले वीर अस्पताललाई ‘कोभिड–१९’ का संक्रमितहरुका लागि प्रयोग गर्ने निर्णय गरेकोमा आलोचना भइरहेको छ । उल्लेखनीय छ, वीर अस्पताल यस्तो सरकारी अस्पताल हो जहाँ विभिन्न रोग विशेषज्ञद्वारा स्तरीय सेवा प्रदान गरिन्छ । व्यावसायिकरणको चपेटामा परेको स्वास्थ्य सेवा निकै महँगो हुँदै गएको अवस्थामा सस्तो र गुणस्तरीय स्वास्थ्य सेवाका लागि परिचित यो अस्पताल विपन्न वर्गका बिरामीहरुको पहिलो रोजाइमा पर्ने गरेको छ । यस्ता अवस्थामा उक्त अस्पताललाई कोरोना संक्रमितका लागि प्रयोग गर्दा न्यून आय भएको ठूलो समुदायलाई स्वास्थ्योपचारको पहुँचबाट टाढा पुर्याउन सक्ने सरोकारवाला बताउँछन् ।
