मुकेश पोखरेल
सागर गिरी नेपालका भर्भराउँदा वन्यजन्तु फोटोग्राफरमध्ये पर्छन्। चितवन राष्ट्रिय निकुञ्जको काख, सौराहामा जन्मे–हुर्केका उनी नजानिंदो रूपमा चराचुरुंगी र वन्यजन्तुको संसारमा मोहित भए।
फोटोग्राफी लगाव चाहिने काम हो। त्यसमा पनि वाइल्डलाइफ फोटोग्राफीमा अझ बढी धैर्य र मिहिनेत आवश्यक हुन्छ। उनीसँग यस्ता धेरै स्मृति छन्, जहाँ वन्यजन्तुका तस्वीर खिच्दाका सास्ती र त्यसभित्रको रोमाञ्च भरपूर छ।
२०७३ मंसीरमा सागरले जीवनमै नयाँ अनुभव गर्दै थिए। बिहान भात र तरकारी पकाई प्याक गरी उनी क्यामेरा, लामा टेलिफोटो प्राइम लेन्ससहितका उपकरण लिएर आठ बजेदेखि नै चितवन राष्ट्रिय निकुञ्जमा डुल्थे। उनको साथमा हुन्थे, गाडी चालक देवेन्द्र शाही ठकुरी।
पाटे बाघको तस्वीर खिच्न गिरी तन–मनले त्यसरी लागिपरेका थिए।
