रुकुम पश्चिममा बालिका बलात्कार गरेको अभियोगमा एक जना पक्राउ परेका छन्।

चौरजहारी नगरपालिका ७ की एक १३ वर्षीया बालिका बलात्कार गरेको आरोपमा वडा १ का १८ वर्षीय मदन गोसाइलाई प्रहरीले पक्राउ गरेको हो।

सल्यानको कुमाख गाउँपालिकास्थित मामाघरबाट घर फर्किरहेकी उनलाई ती गोसाइले सोमबार दिउँसो १ बजे भेरी नदी किनारमा लगेर बलात्कार गरेको प्रहरीले बताएको छ। 

‘घर पुर्‍याइदिन्छु भनेर मोटरसाइकलमा चढाएर बालिकालाई भेरीमा लगेको खुल्नमा आएको छ,’ इलाका प्रहरी कार्यालय चौरजहारीका प्रहरी निरीक्षक धर्मसिङ विष्टले भने, ‘बालिका कराएपछि केही महिलाले देखेर प्रहरीलाई खबर गरेका हुन्।’

 प्रहरीले घटनास्थलबाटै ती गोसाइलाई पक्राउ गरेको प्रहरी निरीक्षक विष्टले बताए। बालिकाको स्वास्थ्य परीक्षण चौरजहारी अस्पतालमा गरिएको छ।