युरोपियन बिजनेस स्कुल, म्युनिखमा स्नातक पढ्दै गर्दा सोनाम मोक्तान काठमाडौं फर्केर गर्ने कामबारे घोत्लिरहन्थे।
२०७२ सालमा उनको पढाइ सकियो। फर्केपछि पारिवारिक व्यवसाय ब्युँताउन सक्रिय भइहाले। हाल उपत्यकाका मुख्य केन्द्रमा 'लोगो' ब्रान्डका स्टोर स्थापना गर्न सफल उनी अचेल यसलाई देशभर फैलाउने सोचमा पुगिसकेका छन्।
उपत्यकाभित्र भक्तपुर, झम्सिखेल, नयाँ बानेश्वर, डिल्लीबजार, लाजिम्पाट र बौद्धमा गरी लोगोका छ वटा स्टोर सञ्चालित छन्। लकडाउनकै कारण ढिला भएको बौद्धको स्टोर भर्खरै सञ्चालनमा आएको हो।
लोगोले महिला र पुरुषले लगाउने सर्ट, टिसर्ट, प्यान्ट, ब्लाउज, ट्राउजर्स आदि कपडा उत्पादन गर्छ। सोनाम लोगोका कपडालाई 'स्मार्ट क्याजुअल', 'क्याजुअल', 'अफिस वेयर' आदिमा वर्गीकरण गर्छन्।
