नेपाल कम्युनिस्ट पार्टी (नेकपा) को आन्तरिक विवाद यतिबेला मत्थर छ। आवरणमा हेर्ने हो भने पार्टी ठिकठाक चलिरहेको छ। पार्टी अध्यक्ष एवम् प्रधानमन्त्री केपी शर्मा ओली र अर्को अध्यक्ष पुष्पकमल दाहाल ‘प्रचण्ड’बीच नियमित भेटघाट भइरहेको छ। प्रधानमन्त्रीविरुद्ध पार्टी नेताहरूका सार्वजनिक अभिव्यक्ति खासै छैनन्। ओलीलाई जोगाउने र हटाउने नाममा हस्ताक्षर पनि आजकाल भइरहेका छैनन्। संविधान संशोधनमा जुटेको राष्ट्रिय सहमति र नागरिकता विधेयकमा पार्टीको लाइन अनुसार संसदीय समितिबाट भएको निर्णयले आवरणमा दलभित्रका मोर्चाबन्दी फिक्का छन्।
तर, शनिबारका लागि बोलाइएको आसन्न स्थायी समिति बैठक र विवाद जारी रहेको मिलेनियम च्यालेन्ज कर्पोरेशन (एमसीसी) सँगको सम्झौता विवादले प्रधानमन्त्री ओली भने आवरण देखिएको जस्तो निश्चिन्त छैनन्।
सम्भावित राजनीतिक मोर्चाबन्दी र सम्झौता अनुमोदनका लागि ओली र उनी निकटहरू सक्रिय छन्। अध्यक्ष प्रचण्डसँगै कांग्रेस सभापति शेरबहादुर देउवासँग पनि प्रधानमन्त्री समदूरीमा छन्। कुनै पनि बेला कोही एकलाई उपयोग गर्ने रणनीतिमा प्रधानमन्त्री ओली देखिन्छन्।
