प्रमुख प्रतिपक्षी दल नेपाली कांग्रेसले केन्द्रीय कार्यसमिति बैठक बोलाएको छ। जेठ १७ गतेका लागि पार्टी कार्यालय सनेपामा केन्द्रीय समिति बैठक बोलाइएको कांग्रेस मुख्य सचिव कृष्णप्रसाद पौडेलले जानकारी दिए। 

बैठकमा केन्द्रीय कार्यसमितिका पदाधिकारी, केन्द्रीय सदस्यहरु तथा आमन्त्रित केन्द्रीय सदस्यहरुलाई अनिवार्य उपस्थितिका लागि आह्वान गरिएको छ।

बैठकमा संसदमा दर्ता भएको संविधान संशोधन प्रस्ताव सम्बन्धमा छलफल हुने पौडेलले बताए। गत शुक्रबार सरकारले लिम्पियाधुरा, कालापानी र लिपुलेक क्षेत्र समेटिएको नक्सामा निसान छाप परिवर्तन गर्न संसद्मा संविधान संशोधन प्रस्ताव दर्ता गराएको थियो। 

तर बुधबारको प्रतिनिधिसभाको सम्भावित कार्यसूचीमा रहेको संविधान संशोधन प्रस्ताव हटाइएपछि कांग्रेस केन्द्रीय समिति बैठकलाई देखाइएको थियो। तर कांग्रेसले त्यसको खण्डन गरेको छ। कांग्रेसले आफूहरु राष्ट्रियताको बिषयमा सरकारको साथ रहेको बताएको छ।