कोभिड—१९ को असरले मुलुकको अर्थतन्त्र चौपट भएको छ। अहिले विगतमा जस्तो सामान्य अवस्था छैन। विगतमा अर्थतन्त्रलाई विस्तार गरेर आर्थिक वृद्धिको लक्ष्य वृद्धि गर्ने गरी बजेट आउँथ्यो। अहिले परिस्थिति फरक छ।
कोभिड असरले नागरिकको ज्यान गएको छ। स्वास्थ्य क्षेत्रमा ठूलो समस्या सिर्जना भएको छ। उद्योग, व्यवसाय, कलकारखाना सबै ठप्प छन्। स्वदेश तथा विदेशमा नेपालीले रोजगारी गुमाएका छन्। यसको असर मुलुकको आर्थिक तथा सामाजिक जीवनमा परेको छ।
आर्थिक वर्ष ०७७÷७८ को बजेट स्वास्थ्य उपचारमा ध्यान दिँदै कोभिडको असरले थला परेको अर्थतन्त्रलाई चलायमान गराउने खालको हुनुपर्छ। बजेटले स्वास्थ्य, कृषि, रोजगारी सिर्जना, पूर्वाधार निर्माणमा प्राथमिकता दिँदै निजी क्षेत्र र अर्थतन्त्र दुवै ‘रिभाइभ’ गर्न सक्नुपर्छ। बजेटमार्फत उद्योगी, व्यवसायीको समस्या सम्बोधन गर्न मौद्रिक, श्रम तथा रोजगार, विद्युत्का समस्यालाई सम्बोधन गर्नुपर्छ। खर्च बढाउने बजेट हुनुपर्छ। खर्च बढाउन गरिब जनतालाई रासनका रुपमा होस् वा कामको रुपमा राहत दिनुपर्छ। खर्च बढेपछि उद्योग, व्यवसाय चलायमान बन्छ।
