• राजु आचार्य -
बेकबहादुर तामाङ ३ दिनसम्म छिमेकी आफन्तकोमा बास बसे। बास बस्नुको कारण पहिला बताएनन्। केही दिन अघि पोखरा-१८ , लामा गाउँ क्षेत्रमा एक तले पुरानो घरभित्र सर्प छिरेको रहेछ। यो बेकबहादुरको घर थियो। उनी डराए। आफैले धपाउन खोजे। उनले सर्प घरबाट लखेट्ने क्रममा सर्पले आक्रमण गरेको थियो। उनी झन् त्रसित बने।
लामो समय बाहिर बस्न सम्भव नभएपछि उद्धारकर्मीहरूलाई खबर गरियो। सर्प कुन प्वालमा थियो पत्ता लगाउन गाह्रो भयो। उनी कति सम्म त्रसित थिए भने, आफ्नो घरै भत्काएर सर्प निकाल्न राजी भए। स्थानीय युवाहरूको सहयोगमा घरको भान्छा तिरको पुरै पाटा भत्काइयो। यतीखेर बेकबहादुरको नोक्सानी भयो।
मानिस र सर्पबीचको द्वन्द्व सामान्य प्राय मानिन्छ। यस्ता द्वन्दहरूमा धेरै जसो सर्पहरुनै मारिन्छन्। मानिसको ज्यानै जान सक्ने गरी नोक्सानी पनि हुन सक्छ। विश्व स्वास्थ्य सङ्गठनका अनुसार वर्षभरि विश्वभर कम्तीमा ८१ हजार मानिसहरूले सर्पको टोकाई (सर्पदंश) बाट ज्यान गुमाउँछन्। स्वास्थ्य सेवा विभागका अनुसार नेपालमा पनि वार्षिक करिब १००० मानिसले सर्पदंशको कारणले ज्यान गुमाउँछन्। तर अहिले पोखरामा अवस्था परिवर्तन भएको छ। आजभोलि सर्प मारिने क्रम भने घट्दो छ।
