पदम बडाल
अहिले विश्वका धेरै मानिसहरू घरभित्रै थुनिएका छन्। कोरोना भाइरसले महामारीको रूप लिएपछि अधिकांश देशमा लकडाउन छ। यसको सबैभन्दा मार विपन्न र दैनिक ज्यालामजदुरी गरी जीवन धान्ने निम्नवर्गीय मानिसहरूलाई परेको छ।
दैनिक मजदुरी गरेर भोक टार्नेहरुलाई भने न कोरोनाको त्रास छ न लक डाउनको डर नै। महाकाली नगरपालिका वडा नम्बर ४ बांगाबगडको महाकाली किनारमा बालुवा निकाल्दै गरेकी दुर्गा लोहारलाई पनि देशमा लक डाउन चलेको र विश्वमा कोरोनाको संक्रमण फैलिएको थाहा नभएको होइन, तर चार छोराछोरीको भोको पेटले उनलाई न घरमा बस्न दिन्छ, न अरुसँगै महाकाली किनारबाट बालुवा निकाल्न रोक्छ। उनी भन्छिन्, ‘भोको मर्नुभन्दा त रोगले मर्नु निको।’
