अहिले संसारभर हेर्‍यौं भने दुई सयभन्दा बढी देशमा एक देशबाट अर्को देशमा जाने क्रम हराएको छ । प्रायः सबै बस्ती लकडाउनमा छन् । पर्यटनको एउटा मूल विशेषता भनेकै एउटा मान्छे एक ठाउँबाट अर्को ठाउँमा जाँदा उसले गर्ने गतिविधिबाट सिर्जित अर्थतन्त्रलाई पर्यटनको अर्थतन्त्र भन्छौं ।

त्यो हिसाबले सबैभन्दा पहिलो र सबैभन्दा गहिरो मार परेको क्षेत्र भनेको पर्यटन नै हो । विश्वव्यापी रूपमा पनि र नेपालमा पनि । अझ पर्यटनभित्र पनि हामीले हेर्‍यौं भने अहिलेको तीन/चार सन्दर्भमा नेपालमा ठूलो लगानी बढिरहेको थियो र मान्छेहरू उत्साहजनक ढंगले पर्यटन क्षेत्रमा आइरहेका थिए । अरू क्षेत्रमा लागेका मान्छेहरू पनि पर्यटन क्षेत्रमा आउने क्रम बढेको थियो ।