अर्थमन्त्री डा. युवराज खतिवडाले भोकबाट मान्छे मर्छ भन्ने कुरा सरकारलाई पनि थाहा भएको बताएका छन् ।
राहतको लाइनमा सबै मान्छेहरु पुगेपछि पाउनुपर्नेले राहत नपाउने र नपाउनुपर्नेले पाउने स्थिति भइरहेको बताउँदै मन्त्री खतिवडाले भने, ‘नागरिकमा पनि यो चेतना चाहिन्छ ।’
चैत महिनाको तलब थाप्नेहरुलाई बजारबाट किनेर खान अर्थमन्त्री खतिवडाले सुझाव दिएका छन् । दैनिक ज्यालादारी गर्ने मजदुरहरुलाई मात्र राहतको लाइनमा बसिदिन उनको अनुरोध छ ।
चेम्बर अफ कमर्सका पदाधिकारीसँगको भेटमा आइतबार अर्थमन्त्री खतिवडाले भने, ‘रोगबाट मात्रै मान्छे मर्दैन, भोकबाट पनि मान्छे मर्छ भन्ने कुरा सरकारलाई राम्रो थाहा छ । हामीलाई धेरैले सिकाइरहनुभएको छ, हामीलाई पनि थाहा छ ।’
