गौरीगञ्ज गाउँपालिकाले माध्यमिक शिक्षा (११–१२ कक्षा) अध्ययन गर्ने छात्राहरुलाई साइकल वितरण गरेको छ। गाउँपालिका–२ मा रहेको कोरोबारी माध्यमिक विद्यालयमा अध्ययनरत २८ छात्रालाई गाउँपालिकाले साइकल वितरण गरेको हो।

वडा सचिव गोविन्द राजवंशीका अनुसार छात्रालाई विद्यालय आउन जान सहज होस् भनी साइकल वितरण गरिएको हो। रु दुई लाख बजेट विनियोजन गर्दै सबै छात्रालाई साइकल वितरण गरिएको बताउदैं उनले भने, 'आदिवासी समुदायको बाहुल्य रहेको यस ठाउँका कतिपय विद्यार्थीले विद्यालय टाढा भएर पनि पढाइ छाड्ने गरेकाले पढाइप्रति प्रोत्साहन गर्न छात्रालाई साइकल वितरण गरिएको हो।'

गाउँपालिकाभित्र बसोबास गर्ने विद्यार्थी पढाइबाट वञ्चित नहुन् भन्दै गाउँपालिकाले पहिलो पटक साइकल वितरण गरेको वडाध्यक्ष अघनुप्रसाद राजवंशीले बताए।