ब्रिटिस प्रेस मेघन मर्केललाई ब्रिटेनबाट लखेट्ने तिनको अभियानमा सफल भएका छन् । तर, मेघनसँगै राजकुमार ह्यारीले पनि ब्रिटेन छाड्नै लागेका छन्, जुन सायद तिनले चाहेका थिएनन् । यो हप्ता सार्वजनिक भएको एक वक्तव्यमा, ह्यारी र मेघनको जोडीले ब्रिटिस परिवारभित्र ‘प्रगतिशील नयाँ भूमिका सिर्जना’ गर्न चाहेको र ‘शीर्ष’ शाही सदस्यको भूमिकाबाट पछि हट्ने बताए । नयाँ भूमिकामा राजदरबारबाट खर्च नलिने पनि तिनले बताएका छन् ।
मेघन र ह्यारीको ‘विदेश बसाइँ सर्ने’ कदमप्रति ब्रिटिस प्रेस आश्चर्यमा पर्यो । यदि मिडियाले ब्रिटिस अश्वेत समुदायमाथि ध्यान दिए भने तिनीहरूले यो घोषणामा आश्चर्य मान्नुपर्ने खासै केही नभएको पाउनेछन् । ब्रिटेनमा अहिले यस्ता प्रधानमन्त्री छन्, जसको राजनीतिक इतिहास चर्को नश्लीय मन्तव्यले भरिएको छ । त्यस्तै, श्वेत राष्ट्रवादबाट प्रेरित ब्रेक्जिट परियोजना मूलभूत रूपमा ठूलो संख्यामा रहेका आप्रवासीलाई ब्रिटेनबाट बाहिर निकाल्ने चाहनासँग जोडिएको छ । साम्राज्यवादीकालका क्रियाकलापप्रति गर्व गर्ने प्रवृत्ति बढेका वेला अन्य अश्वेत पनि असहज महसुस गर्न थालेका छन् ।
