मकवानपुरको भीमफेदी गाउँपालिका–९ अघोरमा कार दुर्घटना हुँदा एक भारतीय नागरिकको मृत्यु भएको छ। दुर्घटनामा परी भारतीय नागरिक ४५ वर्षीय सन्तोषसल्वा कुमारको मृत्यु भएको हो।

वीरगञ्जबाट काठमाडौंतर्फ जाँदै गरेको पर्यटक बोक्ने बा १ य १२८३ नम्बरको कार बिहीबार राति साढे १ बजे अनियन्त्रित भई सडकबाट २० मिटर तल खसेको थियो।

दुर्घटनाबाट गम्भीर घाइते भएका उनको शुक्रबार बिहान हेटौंडा अस्पतालमा उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ।

दुर्घटनाबाट भारत घर भएका अन्दाजी २४ वर्षीया गोपिकानन्द स्वामी र २३ वर्षीया लल्मी साहिटी गरी दुई जना घाइते भएका छन्। प्रहरीका अनुसार, उनीहरूमध्ये एक जना गम्भीर घाइते भएका छन्। उनीहरूको हेटौंडा अस्पतालमा उपचार भइरहेको छ।

घटनाको विषयमा थप अनुसन्धान भइरहेको छ।