मोरङको रतुवामाई नगरपालिका–८ गुरुङ चोकमा मंगलबारराति आफ्नै घरमा बसिरहेकी महिलामाथि आक्रमण प्रयास भएको छ ।

महिलामाथि आक्रमण गर्न खोज्ने छ जनालाई प्रहरीले पक्राउ गरेको छ । घरमा बसिरहेका बेला राति साढे ८ बजे होहल्ला गर्दै पुगेका युवाहरुले ३४ वर्षीय चन्द्रमाया मगरलाई गालीगलौज र दुरव्यवहार गर्दै आक्रमणको प्रयास गरेको प्रहरीले जनाएको छ । पक्राउ पर्नेमा रतुवामाई–५ का २७ वर्षीय यादव पाठक, केदार कटुवाल, २३ वर्षीय सागर कटुवाल, २० वर्षीय सन्दीप राई, २१ वर्षीय प्रकाश राई र १९ वर्षीय दिवश राई रहेका छन् ।

पक्राउ परेकाहरुमाथि अभद्र व्यवहार मुद्दा चलाउन बुधबार म्याद थप गरेर अनुसन्धान अघि बढाइएको मोरङ प्रहरीका प्रवक्ता डीएसपी राजकुमार खिँउजुले बताए । महिलामाथि आक्रमण प्रयास गर्नुको कारण खुलिनसकेको र अनुसन्धान भइरहेको प्रहरीको भनाइ छ ।