नेपाली राष्ट्रिय क्रिकेट टिमका पूर्व कप्तान पारस खड्काले युएईमा हुने टी-१० लिग खेल्ने भएका छन्। हालै कप्तानीबाट राजीनामा दिएका पारसले टिम आबुधाबीबाट टी-१० लिग खेल्ने भएका छन् ।

१० हजार डलरमा पारस ड्राफ्ट अघि नै आबुधाबीमा आबद्द भएका हुन्।

पारस विदेशी फ्रेन्चाइज लिग खेल्ने तेस्रो नेपाली खेलाडी हुन्। यसअघि नेपालका सन्दीप लामिछाने र सोमपाल कामीले विदेशी फ्रेन्चाइज लिग खेलिसकेका छन्।

टी-१० पारसको पहिलो विदेशी फ्रेन्चाइज लिग हो। आबुधाबीमा इंग्ल्याण्डका मोइन अली, मोहम्मद आमिर, रोहन मुस्ताफालगायतका खेलाडी रहेका छन् ।

टी-१० लिगमा नेपालका अर्का खेलाडी सन्दीप लामिछानेले पनि खेल्ने छन् । सन्दीपले यस सिजन कर्नाटका टुसकेर्सबाट खेल्नेछन् । यसअघि उनले केरला किङ्सबाट खेलेका थिए।

आबुधाबीस्थित शेख जायद अन्तर्राष्ट्रिय क्रिकेट रंगशालामा आगामी नोभेम्बर १५ देखि २४ सम्म आयोजना हुने लिगमा ८ टिमले प्रतिस्पर्धा गर्नेछन्।

१० ओभरको हुने लिग राउण्ड रोबिन र प्ले अफको आधारमा हुनेछ।