मोहन वैद्य नेतृत्वको नेकपा–माओवादी (क्रान्तिकार)बाट अलग भएर नेत्रविक्रम चन्द ‘विप्लव’ले पार्टी स्थापना गरेको ५ वर्ष पुगेको छ । पार्टी स्थापना दिवसमा सो पार्टीले देशका विभिन्न स्थानमा कार्यक्रम गरिरहँदा अहिले सो पार्टी प्रतिबन्धित अवस्थामा छ ।
विप्लवको पहिचान विद्रोही नेताका रूपमा छ । राज्यका आँखामा विप्लव र उनको पार्टी अघोषित ‘आतंककारी’ हुन् ।
तत्कालीन नेकपा (माओवादी)ले २०५२ सालमा जनयुद्ध सुरु गर्नुअघिदेखि नै विप्लव तत्कालीन मशाल हुँदै नेकपा (माओवादी)मा क्रियाशील थिए ।
उनले ५ वर्षअघि ८ मंसिर २०७१ मा आफ्नै नेतृत्वमा नेकपा (माओवादी) बनाए र रोल्पामा २०७३ फागुनमा भएको पार्टीको आठौँ महाधिवेशनबाट पार्टीको नाम परिवर्तन गरेर नेपाल कम्युनिस्ट पार्टी बनाए ।
