साँझपख तपाईं काठमाडौंकाु मुटु रत्नपार्क वरपर पुग्नु भयो भने वातावरण बेग्लै देख्न सक्नु हुनेछ । कुनै बेला साँझ छिप्पिएपछि सडक वरपर देह व्यापारका लागि मोल-मोलाइ भैरहेको दृष्य खुलेआमा देखिन्थे । पछिल्लो अवधिमा भने त्यस्ता दृष्यहरु देखिन केही कम भएको छ । के त्यसो भए शहरमा देह व्यापारको धन्दा निर्मूल भएको हो र ? किन हुन्थ्यो, विगतमा एक-अर्काको सामुन्ने गरिने मोल-मोलाइ यतिबेला मोबाइल फोनमार्फत हुन थालेको छ ।
सडक किनारमा हुने देह ब्यापारको मोल-मोलाइ अचेल मोबाइलको एसएमएस तथा सामाजिक सञ्जालबाट हुन थालेको कुरा सुन्दा तपाईंलाई पनि आश्चर्य लाग्न सक्छ । यद्यपि, वास्तविकता भने त्यही नै हो । अचेल देह व्यापारको धन्दा सडकको किनारमा उभिएका दलालहरुमार्फत होइन, फेसबुक, ट्वीटर आदि सामाजिक सञ्जालमार्फत हुन थालेको तर्फ प्रहरीसमेत जानकार छ । यी सामाजिक सञ्जालमा सोझो म्यासेजको सुविधा भएकाले देह व्यापारका दलालहरुले त्यसको फाइदा उठाइरहेका छन् ।
