काठमाडौँ । अहिले नेपालको पोषणको अवस्था हेर्ने हो भने खासै चित्त बुझ्दो अवस्था छैन । सरकारले सुधार हुँदै आइरहेको भने पनि सरकारको तथ्याङ्कलाई हेर्ने नै हो भने सन्तोषजनक अवस्था भने पाइन्न । अझैसम्म पनि नेपालका बालबालिकामा ३६ प्रतिशत पुड्कोपन, रक्तअल्पता ४०, मोटोपन २१ प्रतिशत भएको देशमा पोषणको अवस्थामा सुधार आएको भन्न नमिल्ने पोषणविद्हरूकै भनाइ छ ।
कर्णाली र प्रदेश नं. २ मा अन्य प्रदेशको भन्दा पोषणको अवस्था खस्कँदै गएको छ । ग्रामीण क्षेत्रमा अभावका कारण पोषणको अवस्थामा सुधार आउन सकेको छैन भने सहरी क्षेत्रको व्यस्त जीवनले बजारमा पाइने प्याकेटका खानेकुरा बढी खाँदा पोषणमा समस्या देखिएको छ । जुन सरकारका लागि पनि चुनौतीको विषय बन्दै गइरहेको छ ।
प्याकेटका खानेकुराले पनि नागरिकको स्वास्थ्यमा समस्या बढ्दै गइरहेको वरिष्ठ पोषणविद् डा. उमा कोइरालाको तर्क छ । आफ्नै परम्परागत खानालाई प्राथमिकता दिने हो भने पोषणको अवस्था राम्रो हुन कति पनि समय नलाग्ने देखिन्छ । नेपालको पोषणको अवस्था, नागरिकले खानपानमा ध्यान दिनुपर्ने कुरा, आधुनिक जीवनशैलीले स्वास्थ्यमा पार्ने असर र सरकारले ध्यान दिनुपर्ने कुरा लगायत विषयमा वरिष्ठ पोषणविद् डा. कोइरालासँगको कुराकानी ।
