आठराई गाउँपालिका– २ पाकतिन, तेह्रथुममा जन्मिएका चूडामणि गौतम लामो समयदेखि नेपाली भाषाको संरक्षणमा सक्रिय छन्। उनले नेपाली र अंग्रेजी भाषामा एक सय ११ वटा कृति बजारमा ल्याइसकेका छन्। ‘गौतम नेपाली व्याकरण तथा रचना’, ‘नेपाली बगली कोश’, ‘गौतम विवादित वर्णविन्यासको नेपाली शब्दकोश’, ‘बृहत्तर नेपाली शब्दकोश’लगायतका उनका पुस्तक निकै चर्चित छन्। नेपाली भाषामा देखिएका विकृति र यसको समाधानबारे गौतमसँग अन्वेषण अधिकारीले गरेको कुराकानी :

१ सय ११औँ पुस्तक ‘वर्णविन्यासका दुस्मन’ भाषिक आन्दोलनबारे मेरो अन्तिम पुस्तिका हो। अधिवक्ता स्वागत नेपाल र पत्रकार टपेन्द्रबहादुर कार्कीले २४ भदौ २०७३ मा दायर गरेको रिटमा फैसला गर्दै सर्वोच्च अदालतले शिष्ट परम्पराको नेपाली शब्दको वर्णविन्यासलाई प्रकारान्तरले स्वीकृति प्रदान गरेको छ। र यसको पूर्ण पाठ आइसकेपछि सर्वसाधारणमा विस्तृत जानकारी हुने नै छ।