अमेरिकामा चुनावी तिहारको झिलिमिलि, ह्वाइट हाउसमा दीपावली

अमेरिकी राष्ट्रपति भवन ह्वाइट हाउसमा पनि तिहारको झिलिमिलि आएको छ । राष्ट्रपति बाइडेनले पानसमा बत्ती बालेर दीपावली पर्वको उत्सव शुभारम्भ गरेका छन् । ह्वाइट हाउसको दीपावली कार्यक्रममा उपराष्ट्रपति तथा डेमोक्रेटिक पार्टीकी राष्ट्रपति उम्मेद्वार कमला ह्यारिस पनि सहभागी थिइन्।

यस वर्ष ह्वाइट हाउसमा मनाइएको दीपावलीमा करिव ६सय जना हिन्दू धर्भावलम्वी पाहुनाहरू सहभागी थिए । अधिकांश पाहुनाहरू भारतीय मूलका भए पनि केही पाहुनाहरू नेपाली मूलका पनि थिए ।

अर्को हप्ताको मंगलबार राष्ट्रपति चुनाव भैरहेको यसपटकको दीपावली बिगतमा भन्दा राजनीतिक रूपमा पनि विशेष रहेको छ । चुनावमा सहभागी करोडौ हिन्दू मतदाताको मत जित्न पनि ह्याइट हाउसले ठूलो महत्वका साथ यो पर्व मनाएको छ । 

उज्यालोको चाड तिहारमा अमेरिका अध्यारोबाट उज्यालोतिर जावोस् भनेर सदिच्छाका साथ यसपटक अरू महत्व दिइएको बताइएको छ । अमेरिकामा यसपटक डोनल्ड ट्रम्प अमेरिकालाई अध्यारोतिर धकेल्ने र कमला ह्यारिस उज्यालोतिर लैजाने उम्मेद्वारका रूपमा प्रस्तुत भएका छन् । गर्भपतन, आप्रवासनलगायत ट्रम्पका धेरैजसो एजेण्डाहरू पश्चगामी रहेका छन् ।

दीपावलीको अवसर पारेर राष्ट्रपतिका दुबै उम्मेद्वारले अमेरिकामा रहेका सबै हिन्दू धर्मवालम्वीहरूलाई शुभकामना दिएका छन् । दीपावली अमेरिकामा कुनै धर्म विशेषभन्दा पनि दक्षिण एसियाली चाडका रूपमा ब्राण्डिङ भैरहेको छ ।