राजुकाजी शाक्य न्यु रोड टिम (एनआरटी) क्लबका मुख्य प्रशिक्षकमा नियुक्त भएका छन् ।सम्झौता एक वर्षको भएको हो ।
शुक्रबार प्रशिक्षक राजुकाजी शाक्य र क्लबका अध्यक्ष सुन्दर जोशीले सम्झौता पत्रमा हस्ताक्षर गरेका हुन् । आगामी मंसिर २८ गतेबाट सुरु हुने शहीद स्मारक ए डिभिजन लिग फुटबलका लागि शाक्यलाई एनआरटी क्लबले मुख्य प्रशिक्षकको जिम्मा दिएको हो ।
गत वर्षको ए डिभिजन लिग हुँदा प्रशिक्षक शाक्यले च्यासल युथ क्लबको मुख्य प्रशिक्षक भएर टिम समहालेका थिए । पहिलो पटक ए डिभिजन लिगमा उक्लिएको च्यासललाई प्रशिक्षक शाक्यले आठौ स्थानमा पुर्याएका थिए ।
'अघिल्लो वर्ष भर्खर 'बी' बाट उक्लिएका थियौं। खेलाडीको अभावले नयाँ खेलाडी भित्र्याउन पनि सकेनौं। अझ रेलिगेशनबिनाको लिग भयो,' जोशीले भने, 'यसपटक भने हामीले उत्कृष्ट खेल्ने लक्ष्य लिएका छौं।'
यस्तै एनआरटीले सिजनका लागि चार जना नयाँ खेलाडी भित्र्याइसकेको छ। यु–१८ टिमका मिडफिल्डर एरिक विष्टसँगै फरवार्ड राजेश परियार टिममा भित्रिसकेका छन्। यस्तै अनुभवी खेलाडीद्वय विक्रम धिमाल र प्रकास बुढाथोकी पनि सिजनका लागि एनआरटीमा भित्रिएका छन्।
