दक्षिण अफ्रिकाले तेस्रो तथा अन्तिम टि २० खेलमा भारतमाथि सानदार जित निकालेको छ । पाहुना टोली दक्षिण अफ्रिकाले भारतलाई ९ विकेटले पराजित गर्दै तीन टि २ ० सिरिज १–१ को बराबरीमा सकाएको हो ।

१ सय ३५ रनको सामान्य लक्ष्य दक्षिण अफ्रिकाले १६.५ ओभरमा १ विकेट गुमाउँदै पुरा गर्यो । दक्षिण अफ्रिकाको सहज जितमा कप्तान तथा ओपनर क्विन्टन डी कक ७९ रनमा अविजित रहे । उनले ५२ बलमा ६ चौका र ५ छक्का प्रहार गरे । त्यस्तै रिजा हेन्ड्रिक्सले २६ बलमा ४ चौका सहित २८ रनमा क्याच आउट भए । तेम्बा बभुमा २७ रनमा अविजित रहे ।

भारतका लागि एक मात्र विकेट हार्दिक पान्ड्याले लिए ।

त्यस अघि टस जितेर पहिला ब्याटिङ थालेको भारतले निर्धारित २० ओभरमा ९ विकेट गुमाउँदै १ सय ३४ रन बनाएको थियो । भारतका लागि ओपनर शिखर धवनले सर्वाधिक ३६ रनको योगदान दिए । उनले २५ बलमा ४ चौका र २ छक्का प्रहार गरेका थिए । त्यस्तै ऋषभ पन्त र रविन्द्र जडेजाले समान १९ तथा हार्दिक पान्ड्याले १४ रन जोड्दा अन्यको प्रर्दशन सम्झन योग्य रहेन ।

ओपनर रोहित शर्मा र कप्तान विराट कोहली समान ९ रनमा क्याच आउट भए ।

दक्षिण अफ्रिकाका लागि युवा तीब्र गतिका बलर कागिसो रबाडाले ३ विकेट लिए । यस्तै बेयूरन हेन्डिक्स र बीज्रोन फोर्टुइनले समान २ विकेट लिए । तरबेज शम्सीको नाममा १ विकेट रह्यो । पहिलो खेल वर्षाको कारण रद्ध भएको थियो । दोस्रो खेलमा भारत ७ विकेटले विजयी भएको थियो ।