युरोपेली च्याम्पियन लिभरपुल इटालियन क्लब नेपोलीसँग ३–० ले पराजित भएको छ।

प्रि-सिजनको मैत्रिपूर्ण खेलमा लिभरपुलले खेलेको सबै खेलमा पराजित भएको छ।

यसअघि लिभरपुल पोर्चुगिज क्लब स्पोर्टिङसँग बराबरीमा रोकिए पनि जर्मन क्लब बोरुसिया डोर्टमण्ड र स्पेनिस क्लब सेभियासँग पराजित भएको थियो।

युरोपियन च्याम्पियन लिभरपुलविरुद्ध नापोलीले पहिलो हाफमा दुई र दोस्रो हाफमा एक गोल गरेको थियो ।

इडिनबर्गस्थित मुरेफिल्ड स्टेडियममा भएको खेलमा नेपोलीलाई जिताउन लोरेन्जो इन्साइन नायक बने।

तीन वटै गोलमा उनी प्रत्यक्ष रुपमा संलग्न रहेका थिए।

लोरेन्जोले खेलको १७ औं मिनेटमा गोल गर्दै नेपोलीलाई सुरूवाती अग्रता दिलाए। उनले ड्राइज मार्टिन्सको पासमा गोल गरेका थिए।

खेलको २८औं मिनेटमा अर्काडिउज मिलिकले गोल गर्दै नेपोलीको अग्रता पहिलो हाफमै दोब्बर बनाए।

दोस्रो हाफमा केही लयमा देखिएको लिभरपुलले खेलमा फर्कने कोशिश गर्‍यो। तर,५२ औं मिनेटमा रिबाउण्ड बललाई अमिन युनुसले गोल गर्दै नेपोलीलाई ३-० को अग्रता दिलाए।

त्यसपछि खेलमा गोल भएन र इटालियन क्लब नेपोलीले सहज जित निकाल्यो।