अर्थमन्त्री डा. युवराज खतिवडाद्वारा बुधवार प्रस्तुत आगामी आर्थिक वर्षको बजेट उदार सोचको छैन । नयाँपनको अभाव छ । राजनीतिक र विकासका लागि भनेर ल्याएको कार्यक्रम पुरानै छन् । बजेट भाषणको अन्तिममा पढिएको साढे ८ प्रतिशतको आर्थिक बृद्धि लक्ष्यमात्र नयाँ हो । अनुदार र परम्परागत ढर्रामा आएको यो बजेटले आर्थिक वृद्धि प्राप्त गर्नु यर्थाथमा सम्भव छैन । 

गतवर्ष पहिलो बजेट ल्याउँदा वृद्धभत्ता नबढाएको भनेर डा. खतिवडाको आलोचना भएको थियो । यसपटक अर्थमन्त्रीले यो बढाइदिए । कर्मचारीलाई पनि करिब २० प्रतिशत तलव वृद्धि र महंगी भत्ता भनेर २ हजार थप दिइने भएको छ । सांसदलाई निर्वाचन क्षेत्रमा खर्च गर्न ६ करोड पनि दिइएको छ । यी बाध्यता स्वीकार गर्दा पनि अर्थमन्त्रीले १५ खर्ब ३२ अर्बको आय व्यय विवरणमा निजी क्षेत्रलाई उत्साहित बनाउने कार्यक्रम बजेटमा ल्याउन सक्थे । तर, त्यसमा भने अर्थमन्त्री खतिवडा चुकेका छन् ।