रुपन्देहीको सैनामैनाबाट १० लाख युरो सहित ५ जना पक्राउ परेका छन् ।  पक्राउ पर्नेमा सैनामैना २ की ४५ वर्षिय मिना सुनार, सोही स्थानमा २७ वर्षिय रमेश सुनार, गुल्मी धुर्कोटका २४ वर्षिय राजु सुनार, नवलपरासी बर्दघाटका ३० वर्षिय कमल सुनार र स्याङ्जा गल्याङ २ का ३१ वर्षिय गणेश सुनार रहेका छन्।

उनीहरूलाई पाँच नम्बर प्रदेश प्रहरी अन्तर्गतको नेपालगञ्ज ब्यूरो कार्यालयले कात्तिक २ गते दिउँसो करिब ४ बजे रूपन्देहीको सैनामैना नगरपालिका २ सरौलीबाट उक्त परिणामको युरोसहित पक्राउ गरिएको हो । 

पक्राउ परेकालाई आवश्यक अनुसन्धानका लागि काठमाडौं पठाइएको छ।

प्रहरीले उनीहरूको साथबाट मोबाइल ६ थान, वान मिलियन युरो लेखेको त्रिभुजाकार धातु एक थान, आयाताकार धातु १ थान, सर्टिफिकेट अफ अथेन्टीसिटी लेखेको कागतपत्र, एक मिलियन युरो लेखेको कागजपत्र र एक मिलियन युरोको एक थान नोट पनि बरामद गरेको छ।

प्रहरीका अनुसार उक्त नोट अनुसन्धानका लागि नेपाल राष्ट्र बैंक पठाइएको छ। घटनाको विषयमा अनुसन्धान भइरहेको प्रहरीले जनाएको छ।