काठमाडौं– मंगलबार दिउँसो करिब १ बजे यातायात व्यवस्था विभागको कार्यालय नयाँ बानेश्वरमा १०/१५ जनाको समूह महानिर्देशक कुमारप्रसाद दहालको भेटको पर्खाइमा थिए। दहालले त्यो समूहलाई आफ्नो कार्यकक्ष बोलाए। करिब १ घण्टा छलफल चल्यो।
दहालसँगको छलफलपछि त्यही समूह फेरि भौतिक पूर्वाधार तथा यातायात मन्त्री रघुवीर महासेठको कार्यकक्षअघि देखियो। तिनै व्यक्तिहरु कहिले विभाग र कहिले मन्त्रालय धाइरहेको देखेपछि जान्न मन लाग्यो– आखिर उनीहरु के चाहन्छन्?
ती व्यक्तिहरुलाई चिन्न गाह्रो थिएन । किनकि केहीले ट्याक्सी चालकले लगाउने ज्याकेट समेत लगाएका थिए। उनीहरुले आपसमा गरिरहेको कुराकानीले पनि थाहा हुन्थ्यो, ट्याक्सीसँग उनीहरु कुनै न कुनै हिसाबले सम्बन्धित छन्।
