आधुनिक प्रविधिको विकाससँगै दैनिक प्रयोगबाट हराउँदै गएको परम्परागत जाँतोको स्मरण गराउने गरी मोरङको लेटाङमा निर्माण भएको नेपालकै सबैभन्दा ठूलो जाँतो पर्यटकको रोजाइ बनेको छ।
लेटाङ नगरपालिका-९ मा करिब १५ धुर क्षेत्रफलमा फैलिएको उक्त जाँतो हाल सार्वजनिक अवलोकनका लागि खुला गरिएको छ। देशको प्रमुख राजमार्गबाट ८ किलोमिटर दूरीमा रहेको जाँतो स्थलमा अहिले पर्यटकहरूको घुइँचो लाग्न थालेको छ।
उक्त जाँतो प्रदेश नं. १ सरकारको १० लाख रुपैयाँको सहयोग र स्थानीयवासीको ४ लाख बराबरको जनश्रमदानमा निर्माण गरिएको हो। जातोसँगै आकर्षक पार्क पनि निर्माण भइसकेको छ, जसले पर्यटकहरूलाई थप आकर्षण प्रदान गरिरहेको छ।
लेटाङ वडा नं. ९ का वडाध्यक्ष नन्द किशोर दाहालका अनुसार ‘गाउँघरमा कहिल्यै छुट्न नहुने जाँतो अहिले इतिहास बन्दै थियो। यसलाई आधुनिक स्वरूपमा पुनर्जीवित गरेर पर्यटन प्रवर्द्धन र सांस्कृतिक संरक्षण दुवैलाई सघाउने उद्देश्य रहेको छ।’
जाँतोबाट नामाकरण भएको जाते क्षेत्रमा रहेको यो जाँतो ग्रामीण संस्कृति र पहिचानको प्रतीक बनेको छ। अब यो स्थल न केवल सांस्कृतिक धरोहरको नमुना हो, आन्तरिक पर्यटनको नयाँ केन्द्रको रूपमा पनि विकास भइरहेको छ।
