नयाँ वर्षको अवसरमा नेपाल पर्यटन बोर्ड भृकुटीमण्डपमा सारांश मिडिया ल्याब प्रालीको आयोजनामा ‘पर्यटन साहित्य महोत्सव २०८१’ सम्पन्न भएको छ।

आन्तरिकसँगै बाह्य पर्यटकलाई आकर्षित गर्ने उदेश्यले आयोजना गरिएको कार्यक्रममा पूर्वमन्त्री तथा प्रतिनिधिसभा सदस्य एनपी साउदले युवाको सक्रियताले पर्यटकीयस्थललाई प्रवर्द्धन गर्न सकिने बताए।

‘लोकप्रिय बनिरहेको ट्रेकिङका लागि अहिले काठमाडौं उपत्यकाका सबैतिर अन्तर्राष्ट्रियस्तरका पदमार्ग छन्, हामीले घुमघाम गर्ने शैलीलाई बढाउनुपर्छ। आफ्नो आन्तरिक पर्यटकीयस्थललाई सामाजिक सञ्जालमार्फत प्रवर्द्धन गर्नुपर्छ। त्यसले हामीलाई नयाँ गन्तव्यका बारेमा जानकारी दिन्छ,’ पूर्वमन्त्री साउदले भने।

उनले विशेषत सामाजिक सञ्जालमा सक्रिय रहेका ‘कन्टेन्ट क्रिएटर’लाई पर्यटकीय सम्भावना भएका स्थलका विषयमा सामाजिक सञ्जालमार्फत प्रवर्द्धन गर्न आग्रह गरे।

महोत्सवका अध्यक्ष क्षितिज दाहालले नेपाल पर्यटन बोर्डसँगको सहकार्यमा नेपाललाई चिनाउने उद्देश्यले महोत्सवको आयोजना गरिएको बताए।

उनले भने, ‘नेपालको सकारात्मक संदेश विश्व माँझ पुर्‍‍याउन सकिन्छ भन्ने आशय राखेर यो महोत्सवको आयोजना गरिएको हो। हामी हाम्रो ‘कन्टेन्ट क्रिएटर’मार्फत पर्यटनको नयाँ गन्तव्यको बारेमा जानकारी दिनेछौं।’

आयोजित महोत्सवमा इस्टु कार्की, पवन खतिवडा, सीडी विजय अधिकारी, सुजीता श्रेष्ठ, सिता न्यौपाने, नम्रता सापकोटा, हिमेश पन्तलगायतका ‘कन्टेन्ट क्रिएटर’सँगै नेपाल पर्यटन बोर्डका उपाध्यक्ष कमल सापकोटा सहभागी थिए।

मधेश प्रदेशको समेत प्रतिनिधित्व गर्दै ‘कन्टेन्ट क्रिएटर’ इस्टु कार्कीले नेपाल घुमघामका क्रममा विभिन्न स्थानको प्रवर्द्धन गरिरहेको बताइन्।

‘मेरो घर मधेशमा भएकाले म त्यहाँ पुग्दा जनकपुरको जानकी मन्दिर, बाराको गढीमाई मन्दिर, बरमझियाको पेडालगायत प्रवर्द्धन गरिरहेकी हुन्छु। म लगायत सामाजिक सञ्जालमा सक्रिय केही साथीले कन्टेन्ट बनाउँदा आर्थिकसँगै समन्वयको समस्या भोगिरहेका हुन्छौं। पर्यटन बोर्डसहितका स्थानीय निकायले सहकार्य गरेर न्यून गरिदिएमा हामीले अझैँ प्रवर्द्धन गर्नसक्छौं। मसहित धेरै साथी सहकार्य गर्न तयार छौं।’

महोत्सवमा टेक्सस अन्तर्राष्ट्रिय विद्यालयका विद्यार्थीले गीत तथा नृत्य प्रस्तुत गरेका थिए।