शुक्रबार राष्ट्रिय स्वतन्त्र पार्टीका सभापति रवि लामिछानेलाई पक्राउ गर्न निवासमै पुग्दा एक प्रहरी अधिकारीले देखाएकाे ‘हर्कत’काे चारैतिर विरोध भइरहेको छ।
लामिछानेलाई पक्राउ गर्ने टोलीकाे सदस्यका रुपमा त्यहाँ गएका डीएसपी दीपक खड्काले सुरुमै ‘अन्तिम इच्छा’ सोधेपछि उनको आलोचना भइरहेको छ। उनको हर्कतको रास्वपा नेताहरूले ठाउँको ठाउँ प्रतिवाद गरेपछि खड्काले आफ्नो भनाइ सच्याएका थिए।
शुक्रबार उच्च अदालत तुलसीपुरको बुटवल इजलासले जिल्ला अदालत रुपन्देहीको धरौटीमा छाड्ने आदेश खरेज गर्दै लामिछानेलाई थुनामा पठाउने आदेश दिएलगत्तै प्रहरी टोली पक्राउ गर्न काठमाडौंको हात्तिगौडास्थित उनको निवास गएको थियो।
त्यसैक्रममा डीएसपी खड्काले रविको ‘अन्तिम इच्छा’ पूरा गर्न भनेका थिए। उनको रास्वपा नेताहरूसँग नोकझोकको भिडियो यतिबेला सामाजिक सञ्जालमा भाइरल छ।
प्रहरी अधिकारीकै यस्तो व्यवहार देखेपछि रास्वपा नेताहरूले प्रहरीको नियतमाथि प्रश्न उठाएका छन्। कतै लामिछानेको ‘ज्यानलाई नै खतरा’ छैन भन्ने उनीहरूको आशंका छ।
यद्यपि डीएसपी खड्काले लामिछानेलाई पक्राउ पर्नुअघिका अन्तिम प्रकियाबारे आफूले बताएको स्पष्टीकरण दिएका थिए। तर, त्यहाँ लामिछानेमाथि प्रहरीको व्यवहार कुनै अपराधीलाई गर्ने व्यवहार भन्दा कम थिएन।
अदालतको आदेशको मसि सुक्न नपाउँदै प्रहरी उनलाई पक्राउ गर्न पुगिसकेको थियो। उच्च अदालतको आदेश जिल्ला अदालत पुगेपछि जिल्ला अदालतले प्रहरीलाई पक्राउ गर्ने आदेश दिनुपर्ने हुन्छ। तर, उच्चको आदेश जिल्ला नपुग्दै प्रहरी टोली लामिछानेको निवास पुगिसकेको थियो।
यतिसम्म कि, संसदकै चौथो ठूलो दलका सभापति त्यसमाथि पूर्वगृहमन्त्रीसमेत रहेका लामिछानेलाई पक्राउ गर्न डीएसपी खड्का सहितको टोली बिना पूर्जी पुगेको थियो। त्यसमा पनि प्रहरीको रवैया असामान्य देखियो।
लामिछानेले पक्राउ पूर्जी मागेपछि प्रहरीले उनलाई भन्दै थियो, ‘अदालतको आदेश आइसकेपछि किन चाहियो पक्राउ पूर्जी?’ यद्यपि प्रहरीले उनकै अघि पक्राउ पूर्जी बनाएपछि लामिछानेले गिरफ्तारी दिएका थिए।
को हुन् डीएसपी दीपक खड्का?
डीएसपी दीपक खड्का उर्फ विवादका पर्याय। जहाँ-जहाँ कार्यकाल सम्हाले त्यहाँ कुनै न कुनै विवादमा नफसेको रेकर्ड नै छैन। धम्की, चन्दा असुली र ज्यादती त उनको नियत नै बनिसकेको छ।
डीएसपी खड्का नेकपा माओवादी केन्द्रका अध्यक्ष पुष्पकमल दाहाल प्रचण्डका पूर्वपीएसओ हुन्। उनीमाथि नेताहरूको साँठगाँठमा अनैतिक कामहरू गर्ने गरेको आरोप लाग्ने गरेको छ।
महानगरीय प्रहरी वृत्त सोह्रखुट्टेको इन्चार्ज रहँदा उनी कारबाहीमा समेत परेका थिए। निषेधाज्ञामा ठमेल क्षेत्रका केही रात्रीकालीन व्यवसायीसँग मिलेर अवैध गतिविधीलाई प्रोत्साहन दिएको खुलेपछि उनी कारबाहीमा परेका थिए।
यसअघि पनि कार्यक्षमता सन्तोषजनक नभएको, आर्थिक लाभ लिने गरेको र ठमेल क्षेत्रका केही रात्रीकालीन व्यवसायीसँग मिलेर मनोमानी गर्ने गरेको गुनासो आउने गरेको थियो।
डीएसपी खड्काले ठमेल क्षेत्रमा खराब आचारण भएका केही व्यत्तिलाई संरक्षण दिएर अन्य व्यापारीबाट रकम असुली गर्ने गरेको गुनासोपछि महानगरीय प्रहरी कार्यालय रानीपोखरीले उनीविरुद्ध छानविन समिती नै बनाएको थियो।
छानविन समितीको अनुन्धानपछि उनलाईलाई रेकर्डमा जनिनेगरी नसिहत दिइएको हो। कारबाहीसँगै १६ महिनादेखि सोह्रखुट्टेमा कार्यरत खड्कालाई सोह्रखुट्टेबाट हटाइएको थियो।
०००
यसअघि उनी जिल्ला प्रहरी कार्यालय रोल्पाका प्रमुख रहँदा नेत्रविक्रम चन्द 'विप्लव' नेतृत्वको नेकपाका स्थानीय नेता कार्यकर्ताको घर तोडफोड गर्नुका साथै महिला बालबालिकामाथि प्रहरीले मार्नेसम्मकाे धम्की दिँदै त्रास सिर्जना गरिएको
भन्दै जीउधनको सुरक्षाका लागि राष्ट्रिय मानवअधिकार आयोगमा उजुरी परेकाे थियो।
स्थानीयवासीसमेत रहेका विप्लव नेतृत्वको नेकपा रोल्पाका इन्चार्ज जयप्रकाश रोका, युवा नेता अमित घर्तीलगायतको घरको ढोका फोडी गाउँलाई नै आतंकित पार्न खोजेको र डीएसपी दीपक खड्काले आफूहरूलाई ज्यान मार्ने धम्की दिएको आरोप लगाएका थिए।
०००
दोलखाको मेलुङ गाउँपालिका-१ पवटी निवासी नेकपा एमाले दोलखाका जिल्ला कमिटी सदस्य कपिलमणि न्यौपानेको आत्महत्या प्रकरणमा समेत डीएसपी खड्काको नाम जोडिएको थियो।
जिल्ला प्रहरी कार्यालय दोलखाका प्रमुख रहँदा डिसपी खड्काको टर्चरका कारण न्यौपानेले आत्महत्या गरेको भन्दै आफन्तले जिल्ला प्रहरी कार्यालय घेराउ गरेका थिए।
खड्काले मदिरा सेवन गरेर फोनमा न्यौपानेलाई बारम्बार धम्की दिने गरेको आरोप लागेको थियो। आत्महत्याको अघिल्लो दिनपनि खड्काले न्यौपानेलाई फोनबाट धम्की दिएको परिवारले आरोप लगाएका थिए।
