पोखरामा स्कुटर चोरी गरेको आरोपमा ३ जना पक्राउ परेका छन्।
पक्राउ पर्नेमा पोखरा महानगरपालिका-११ बस्ने बर्ष २६ का सन्तोष लामिछाने, मादी गाउँपालिका-३ घर भई हाल पोखरा १५ बस्ने बर्ष २७का कीरण परियार र नवलपरासीको पश्चिम सुस्ता गाँउपालिका-५ बस्ने बर्ष ३० का प्रहलाद कोहारलाई पोखरामा स्कुटर चोरी गरेको आरोपमा प्रहरीले पक्राउ गरेको हो।
पक्राउ परेका ३ जनामध्ये लामिछाने र परियारले गएको पुस ९ गते मध्यराती पोखराको पृथ्वीचोकमा पार्किङ गरी राखेको ग २५ प ७१३ नम्बर र ग १८ प २७३७ नं.को स्कुटर चोरी गरेकोमा ग १८ प २७३७ नं.को स्कुटर कोहारले किनेको वडा प्रहरी कार्यालय बैदामका प्रमुख डिएसपी सन्तोष निरौलाले जानकारी दिए।
पोखराको पृथ्वीचोकबाट चोरी भएको दुई वटा स्कुटर खोजतलाश गर्ने क्रममा अभियुक्तद्वय लामिछाने र परियार पक्राउ परेकोमा उनीहरुले आफूहरुले चोरी गरेको स्कुटर कोहारलाई बेचेको प्रहरी समक्ष बताएका छन्।
उनीहरुको बयानका आधारमा कोहारलाई ग १८ प २७३७ नं.को स्कुटर सहित नवलपरासीबाट पक्राउ गरेर ल्याइएको डिएसपी निरौलाले बताए।
उनीहरु तीनै जनाविरुद्ध कास्की जिल्ला अदालतबाट चोरी तथा डाँका सम्बन्धी कसूरमा म्याद थप गरी अनुसन्धान प्रक्रिया अगाडि बढाइएको छ।
