हुम्लाको सिमकोट गाउँपालिका–४ को पावरहाउस नजिक एक युवकको शव फेला परेकाे छ।
पावरहाउस नजिक रहेको भदुखोलामा हेल्दुम गाउँका अन्दाजी ३८ वर्षीय चिरञ्जीवी शाही मृत अवस्थामा भेटिएको जिल्ला प्रहरी कार्यालय हुम्लाका प्रहरी नायव उपरीक्षक रवीन्द्र खनालले बताए।
हेल्दुम गाउँका स्थानीय नरेन्द्र शाहीले खोलामा बेवारिसे शव भेटाएको भन्ने जानकारी प्रहरीलाई दिएलगत्तै प्रहरी निरिक्षक सुरेश सुवेदी नेतृत्वको टोली घटनास्थलतर्फ पुगेको थियो।
भदुखोलाको ५० मिटर टाढा भेटिएको शव माथिल्लो शरीर पानीमा डुबेको र शरीरको तल्लो भाग मात्रै देखिएको थियो। उक्त शवलाई शनिबार सदरमुकाम सिमकोट ल्याउने प्रहरीले जनाएको छ। घटनाको विषयमा थप अनुसन्धान भइरहेको छ।
