नेपाल प्रिमियर लिग (एनपिएल)मा आइतबार भएकाे दाेस्राे खेलमा पाेखरा एभेन्जर्सलाई हराउँदै सुदूरपश्चिम रोएल्सले शीर्ष स्थान बनाएकाे छ। यससँगै सुदूरपश्चिमले प्लेअफमा स्थान पनि पक्का गरेकाे छ।
त्रिवि क्रिकेट मैदानमा भएको खेलमा पोखरालाई ५ रनले पराजित गर्दै सुदूरले एक खेल अगावै प्लेअफमा स्थान पक्का गरेकाे हाे। ६ खेलबाट उसको १० अंक भएको छ।
पोखरा भने ४ अंकमा सीमित रहँदै लिग चरणबाटै बाहिरिएको छ।
सुदूरपश्चिमसँगै जनकपुर बोल्ट्स र चितवन राइनोजले प्लेअफमा स्थान बनाएका छन्। पहिलो खेलमा विराटनगर किङ्सलाई एक विकेटले पराजित गरेको काठमाडौं गुर्खाजसँग समान ८ अंक भएपनि रनरेटमा पछि पार्दै चितवनले प्लेअफमा स्थान बनाएको हो।
