पूर्वगृहमन्त्री एवम् राष्ट्रिय स्वतन्त्र पार्टी (रास्वपा)का सभापति रवि लामिछानेलाई पोखरा लगिएको छ।

पर्साको सानो पाइला सहकारी ठगी प्रकरणमा बयान सकिएपछि लामिछानेलाई बुधबार वीरगञ्जबाट काठमाडाैँ हुँदै बुद्ध एयरको जहाजमार्फत पोखरा लगिएको हाे।

कास्की प्रहरीको हिरासतमा रहेका उनलाई बयानका लागि सोमबार पोखराबाट काठमाडौँ र काठमाडौँबाट बुद्ध एयरको जहाजमार्फत सिमरा पुर्‍याइएको थियाे। पर्सामा बयान सकिएपछि लामिछानेलाई पुन: पोखरा पठाइएकाे हाे।

रविसँगै उनकी पत्नी निकिता पौडेल पनि साेही जहाजमा पोखरा गएकी छन्।

लामिछानेमाथि सानो पाइला सहकारीसँगै बुटवलको सुप्रिम सहकारी, कास्कीको सूर्यदर्शन सहकारी, चितवनको साहारा सहकारीलगायतको रकम हिनामिनामा गरेकाे आरोप छ।

उनीमाथि सहकारी ठगी, सम्पत्ति शुद्धीकरण र सङ्गठित अपराध आरोपमा अनुसन्धानमा भइरहेकाे छ।

गोर्खा मिडियाका तत्कालीन प्रबन्ध निर्देशकसमेत रहेका लामिछानेलाई सहकारीको रकम अपचलन र संगठित अपराधमा गत कात्तिक २ गते पक्राउ गरिएकाे थियाे।