विराटनगरमा एक युवकको हत्या भएको छ भने दुई जना गम्भीर घाइते भएका छन्।

माेरङकाे कटहरी गाउँपालिका-१ का २१ वर्षीय करण कामतको सोमबार राति हत्या भएकाे जिल्ला प्रहरी कार्यालय मोरङले जनाएकाे छ।

कटहरी–१ कै २२ वर्षीय विक्रम मण्डल र १७ वर्षीय अमन राय गम्भीर घाइते छन्।

सोमबार राति करिब १० बजे विराटनगर महानगरपालिका-२ स्थित नेपाल टेलिकमनजिक तीनै जना शरीरमा धारिलो हतियार प्रहार भएकाे अवस्थामा भेटिएका थिए। गम्भीर घाइते कामतको उपचारका लागि अस्पताल लगिएकाेमा मृत्यु भएकाे हाे।

प्रहरीका अनुसार मृतक कामतको छाती र कम्मरको भागमा चक्कु प्रहार भएकोजस्तो चोट देखिएको छ।

यसैगरी घाइते भएका मण्डलकाे पाखुरा र ढाडमा धारिलो हतियार प्रहार भएकाे चोट छ भने रायकाे कोखा र ढाडमा चोट छ। दुई जनाको नोबेल शिक्षण अस्पतालमा उपचार भइरहेको प्रहरीले जनाएकाे छ।

प्रहरीका अनुसार दुई पक्षबीच भएको ग्याङफाइटजस्तो देखिएकाे छ। घटनाबारे थप अनुसन्धान भइरहेकाे प्रहरीले जनाएकाे छ।