घण्टीलाई प्रतीक र खास पात्र बनाएर कोरिएका कलाकार उमेश श्रेष्ठका चित्रहरू भर्खरै (८ देखि २९ सेप्टेम्बर) सिद्धार्थ कला दीर्घामा प्रदर्शन गरियो । ‘फ्रम मन्डेन फ्रिक्सन टु सेल्फ फ्लो’ नाम दिएर गरिएको यस एकल प्रदर्शनीमा राखिएका चित्रले उनकै चारित्रिक विशेषता झल्काउँथ्यो ।
आफ्ना कलाबारे उनले भने, ‘मेरा कला मैसँग नजिकबाट गाँसिएका छन् । म आफू हुनु, आफैँ मात्र हुनुको बोध यी कलामा आएका छन् । नितान्त, शान्त, एकान्त, एकाग्रहको प्रत्याभूतिको स्वरूप नै मेरो परिचय हो । मसँगै हिँडेका मेरा भावना, अनुभव, विश्वास, दर्शनलाई कलामा ल्याउने कोसिस गरेको छु । म आफैँ शास्वत–सत्य हुने मेरो कोसिस पनि हो ।’
