यसै साता पश्चिमी सैन्य गठबन्धन नेटोले फिनल्यान्डका रूपमा नयाँ सदस्य पाएको छ । 

नेटो सदस्य टर्की (टुर्किये) र हंगेरीले फिनल्यान्डको सदस्यताका लागि लामो समयसम्म अवरोध गरेको भए पनि अन्ततोगत्वा मञ्जुरी दिएका छन् । त्यसपछि नेटोको केन्द्रीय कार्यालय ब्रसेल्समा अन्य ३० देशको झण्डासँगै फिनल्यान्डको झण्डा पनि फहराइएको छ । 

दशकौंसम्म पश्चिम र रुसका बीचमा तटस्थ भूमिका निर्वाह गर्दै आएको फिनल्यान्ड पश्चिमी खेमामा प्रवेश गर्नका लागि रुसले छिमेकी मुलुक युक्रेनमाथि गरेको आक्रमण तात्कालिक कारण बन्न पुगेको छ । युक्रेनले नेटोको सदस्यता प्राप्त गर्नका लागि कोशिश गरेपछि आफूलाई सुरक्षा खतरा आइलाग्ने भनी रुसले युक्रेनमाथि आक्रमण गरेको हो । अहिले रुसको अर्को छिमेकी फिनल्यान्ड नेटोको सदस्य भएपछि रुसलाई धक्का पुगेको भनी पश्चिमी सञ्चारमाध्यमहरूमा विश्लेषण आएका छन् ।