सरकारले तरलता अभाव भएको भन्दै महिनौदेखि महँगो वस्तुहरुको आयातमा प्रतिबन्ध लगाएको थियो। तर, त्यसभन्दा अघि मुलुकमा भित्र्याइएका महँगा सवारीसाधनको बिक्रीमा भने त्यस्तो केही निर्देशन दिएको थिएन। यस्ता गाडीहरु भने बजारमा नगदमै धेरै खरिद-बिक्री भएका छन्।
बजारमा पैसा नभएको भन्दै बैंकहरुले समेत ऋण दिन मानिरहेका छैनन्। 'अटो लोन' लगभग ठप्पको अवस्था छ। यस्तो अवस्थामा पनि नेपालमा भने महँगा गाडी बिक्री भइरहेका छन्। हाल ६ करोड रुपैयाँसम्म पर्ने गाडीहरु पनि बिक्री भइरहेका छन्।
फोर्ड गाडीको आधिकारिक बिक्रेता जीओ फोर्डका अनुसार कम्पनीले मासिक रुपमा यो समयमा पनि ३ देखि ४ युनिट आफ्ना 'हाइ रेन्ज'को गाडी बिक्री गरेको छ। बिक्री भएका गाडीमध्ये ५० प्रतिशत नगद नै जम्मा गरेर लैजानेहरु रहेको कम्पनीले जनाएको छ।
