बिहेमा भोज खाएपछि पाल्पाको चिर्तुङधारा गाउँका ८० जनाभन्दा बढी बिरामी परेका छन्। 

पाल्पाको बगनासकालि गाउँपालिका १ चिर्तुङधारास्थित बुढाखान्डे, भाङजेली, अम्रेली, पिपरटुङ, ढाडटोल र घोरबन्दा गाउँका ८० जना भन्दा बढी बिरामी परेका हुन्। मंसिर १७ गते शनिबार चिर्तुङधारास्थित दानबहादुर गाहाको छोरीको बिहेमा भोज खाएकाहरु बिरामी परेको चिर्तुङधारा स्वास्थ्य चौकी प्रमुख सिअहेव अधिकृत नोदप्रसाद बस्यालले बताएका छन्।  

घोरबन्दा गाउँका ताराबहादुर गाहा, रिखीराम गाहा, दलबहादुर गाहा, गुनबहादुर गाहा लगायत दर्जन बढी परिवारका सबै बिरामीलाई सोमबार जाँच गरिएको वास्थ्य चौकी प्रमुख बस्यालल बताए। 

बिरामी भएकाहरुलाई ज्वरो आउने, पखाला लाग्ने, टाउको दुख्ने, वाकवाकी लाग्ने, वान्ता हुने लगायतका समस्या देखिएको थियो। स्थानीय स्वास्थ्य संस्थामा उपचार गर्दा निको नभएपछि २२ जना बिरामीको तानसेन स्थित यूनाइटेड मिसन अस्पतालमा उपचार भएको वडाध्यक्ष शेरबहादुर रानाले जानकारी दिए। वडाध्यक्ष रानाका अनुसार बिहे भएको घरमा गएर भोज खाने प्राय सबै बिरामी परेकाले समस्या आएको छ। यहाँ प्युठान नगरपालिका–६, गुरुङगाउँबाट जन्ती आएका थिए।

भोजमा पाडा (राँगो) को मासु, पुलाउ, आलु र गोभीको तरकारी, मेवाको अचार, बटुक, आलु मुलाको अचार थियो। कतिपयले पानी धमिलो देखिएको र पानीकै कारण पनि हुन सक्ने आशंका गरेका छन्। प्यूठानमा समेत भोज खाएर गएकाहरु बिरामी परेका छन्। जन्ती आएका प्यूठानका एकै गाउँका ४५ जना बिरामी परेका छन्। स्वास्थ्य चौकी चिर्तुङधाराले मंगलबार पनि बिरामीको जाँच गर्ने जनाएको छ।