मुलुक निर्वाचनमा प्रवेश गरेको छ । असोज २३ गते प्रत्यक्षतर्फ संघ र प्रदेशमा उम्मेदवारी दर्ता भएसँगै मंसिर ४ को तयारी तीव्र बनेको छ । यथार्थमा निर्वाचन नेपाली कांग्रेस र नेकपा (एमाले) का बीचमा हुँदैछ ।
एक्लै लड्दा अस्तित्व समाप्त हुने डरले माओवादी, एकीकृत समाजवादी, लोकतान्त्रिक समाजवादी र जनमोर्चाले कांग्रेसको ओत लिएका छन् भने सत्ताधारी गठबन्धनमा अन्तिम बेलामा कुरा नमिलेपछि जनता समाजवादी एमालेसँग आएको छ । राप्रपाले समेत एमालेको साथ खोजेको छ । अर्थात् गत संसद्मा प्रतिनिधित्व गर्ने नेमकिपा बाहेक कुनै पनि दल यसपटक एक्लै चुनावमा गएका छैनन् ।
चुनावी सरगर्मीसँगै सम्भावित चुनावी परिणामका बारेमा आकलन गर्ने क्रम सुरु भएको छ । राजनीतिलाई गतिसँग नबुझ्ने र फिल्डमा के भइरहेको छ भन्ने कुराबाट टाढा बसेकाहरू गत स्थानीय चुनावको आँकडा केलाएर जोडघटाउ गरेर परिणाम निकाल्न व्यस्त छन् । चुनाव दुई ध्रुवका बीचमा हुने भएकाले जनमत पनि यही रूपमा विभाजित हुने पक्का छ ।
