‘नयाँ पुस्तक लेखेको छु, लिन आउनु पर्यो,’ डिल्लीबजार कारागारबाट रेशम चौधरीले चैत अन्तिम साता फोन गरेका थिए । वैशाखको पहिलो साता सहकर्मी मदन ढुंगानासँग रेशमलाई भेट्न जाने मौका जुर्यो । कुराकानीको सुरुमै उनले आफ्नो नागरिक उन्मुक्ति पार्टीले ६ स्थानीय तहमा जित्ने दावी गरेका थिए । ‘गठबन्धनको अगाडि तपाईंको जोड चल्दैन, धेरै नखोक्नुस्,’ हामीले भनेका थियौं । तर उनी पनि के कम, हामी यो यो पालिका जित्छौं भनेर पालिका सूची लेखेरै हातमा थमाइ दिए । 

चुनावअघि एमाले अध्यक्ष केपी ओलीले रेशमको पार्टीसँग पनि सहकार्य हुन सक्ने भनेका थिए । अझ ओलीले नै रेशमलाई पार्टी खोल्न खर्च समेत उपलब्ध गराएको गाइँगुइँ थियो । यसबारे संकेत गर्दा कुम उचाल्दै जोशिलो पाराले रेशमले भने,‘इन्द्रको बाबु चन्द्र आए पनि नागरिक उन्मुक्ति पार्टीले कसैसँग गठबन्धन गर्नेवाला छैन । हाम्रो पार्टी कति पानीमा छ, हामी परीक्षण गर्न चाहन्छौं । हामी परीक्षणकालमै खरो भएर देखाउने छौं ।’