हिमालयन शेर्पा क्लब र फ्रेन्ड्स क्लबले सहिद स्मारक ए डिभिजन लिग–२०७८ को अन्तिम खेलमा १–१ गोलको बराबरी खेल्दै अंक बाँडेका छन्। 

बिहीबार त्रिपुरेश्वर स्थित दशरथ रंगशालामा भएको खेलमा दोस्रो हाफमा दुबै टोलीले एक एक गोल गर्दै बराबरी खेलेका हुन्।बराबरसँगै फ्रेन्ड्सले १२औँ स्थानमा रहेर लिग टुंगाएको छ। १३ खेलबाट ११ अंक बनाएको फ्रेन्ड्स एक खेलअघि रेलिगेसन जोनबाट बचेको थियो। 

यता, शेर्पा भने १३ खेलबाट १४ अंकसहित नवौँ स्थानमा छ। उसको भने स्थान टुंगो लागेको छैन । नेपाल पुलिसको खेलपछि शेर्पा र पुलिस दुबैको स्थान पक्का हुनेछ। खेलको ८७औँ मिनेटमा फ्रेन्ड्सका श्याम बाबु क्यापछकीले गोल गर्दै अग्रता दिलाए। तर, दुई मिनेट नबित्दै शेर्पाका विशोन गुरुङले बराबरी गोल फर्काए।

आज नै सातदोबाटोस्थित एन्फा कम्प्लेक्समा भएको खेलमा सातदोबाटो युथ क्लबले च्यासल युथ क्लबलाई १–० अन्तरले पराजित गर्यो।यस सिजनको लिग मछिन्द्र फुटबल क्लबले जितिसकेको छ भने ब्रिगेड ब्वाईज क्लब (बीबीसी) र च्यासल युथ क्लब दोस्रो डिभिजनमा घटुवा भएका छन्।