मिलिनियम च्यालेन्ज कर्पोरेन (एमसीसी)को विरोधमा नेपाल बन्द गराउँदै हिँड्ने २१ जनालाई प्रहरीले पक्राउ गरेको छ।

संसदको तल्लो सदनबाट एमसीसी अनुमोदन चर्चासँगै विरोध प्रदर्शनमा उत्रिएका राजनीतिकर्मीहरूलाई प्रहरीले विभिन्न स्थानबाट नियन्त्रणमा लिएको छ।

बन्द गराउँदै हिँडेका २१ जनालाई काठमाडौंको विभिन्न स्थानबाट नियन्त्रणमा लिएकाे काठमाडौं प्रहरी प्रवक्ता एसपी दिनेश मैनालीले बताएका छन्। उनका अनुसार काठमाडौंको बानेश्वर, कोटेश्वर, सुनधारालगायतका स्थानबाट शंकास्पद व्यक्तिलाई पक्राउ गरिएकाे छ।

एमसीसी सम्झौताविरुद्ध पाँचवटा कम्युनिस्ट पार्टी र एउटा मोर्चाले आज बुधबार नेपाल बन्दको घोषणा गरेका छन्। प्रतिनिधि सभाको बैठकमा एमसीसी टेबल हुने सम्भावना रहेको भन्दै ती दलहरूले बन्दको घोषणा गरेका हुन्। 

मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वको नेकपा माओवादी केन्द्र समाजवादी तथा सीपी गजुरेल नेतृत्वको देशभक्त गणतान्त्रिक मोर्चा नेपालले देशव्यापी बन्द आह्वान गरेका हुन्।

गृह मन्त्रालयले मंगलबार नै ७७ वटै जिल्ला प्रशासन कार्यालयलाई परिपत्र गरेर शान्ति सुरक्षा चुस्त राख्न निर्देशन दिइसकेकाे छ।

'नेपाल कम्युनिष्ट पार्टी लगायतका ६ वटा राजनीतिक दलले फागुन ४ गते नेपाल बन्दको आह्वान गरेको भनी सूचना प्राप्त भएकोले सो सन्दर्भमा कानून विपरीतका उल्लेखित गतिविधि हुन नदिन सम्पूर्ण सुरक्षा संयन्त्रले उच्च सतर्कता र निगरानी बढाई जिल्लाको समग्र शान्ति सुरक्षा र सुव्यवस्थालाई चुस्त दुरुस्त बनाउनुहुन आदेशानुसार अनुरोध छ,' गृहमन्त्रालयले भनेको छ।