गुरुकुल अब कहिले सुरु हुन्छ? बारम्बार सोधिने प्रश्न। यो प्रश्न जसले रंगकर्मी सुनील पोखरेललाई घोचिरहन्थ्यो। बन्द भएको थिएटर पुन: सञ्चालन गर्न नचाहेका होइनन् उनले। तर, अभाव पैसा र जग्गाको। त्यही अभाव सधैँ गुरुकुलका लागि तगारो। सुनील गुरुकुल थिएटरका लागि दिगो स्थानको खोजीमा थिए। उनले सरकारसँग जग्गा भाडामा उपलब्ध गराइदिन भनिरहे। र, सरकारहरुले आश्वासन पनि दिइरहे।
बन्द भएको गुरुकुल थिएटरले १० वर्षपछि भने पुनर्जीवन पाएको छ। पुस ३० गतेबाट यो थिएटर फेरि सञ्चालनमा आयो। सुरुवाती दिनमा सुनील पोखरेलको अनुवाद र निर्देशन रहेर पुरानै नाटक ‘पुतलीको घर’ मञ्चन गरिएको छ। यसरी १० वर्षपछि गुरुकुल सञ्चालन हुनुलाई एउटा संयोगका रुपमा लिन्छन् पोखरेल।
