टिम वर्क र व्यक्तिगत जनसम्पर्क भयो भने प्रहरीमा कस्ता सूचना आउँछन् अनि सामान्य लागेका व्यक्तिहरु पनि कति जटिल अपराधमा संलग्न हुन सक्छन् भन्ने देखाउन यो अंकमा दुई वटा घटना उल्लेख गर्छु।
यस्तोमा चाहिँ व्यक्तिको स्वभावमा भर पर्छ। कुनै-कुनै प्रहरीमा अनौठो बानी हुन्छ जसले नसोचेका सूचनाहरु आउँछन्।
दिवस उदास त्यस्तै एक निकै प्रोफेसनल प्रहरी अफिसर थिए। गजबको काम गर्ने। उनको एउटा अनौठो बानी थियो, जहाँ गयो त्यहाँ सम्बन्ध बढाइहाल्ने। सानोदेखि ठूलोसम्म उस्तै राम्रो सम्बन्ध बनाउने। हाई-हेलो मात्रै हैन क्या, विश्वासिलो सम्बन्ध।
ठमेलमा कार्यालय हुँदा ठमेलभरिकासँग सम्बन्ध बनाइसकेका थिए। नयाँ बानेश्वर आयो, त्यस्तै। जहाँ बस्यो त्यहाँको पब्लिकसँग सम्बन्ध बनाउने। उनीहरुसँग भेट्ने। सम्बन्ध राखिराख्ने। यस्तो बानी धेरैमा हुन्न। फिल्डको सूचना प्रहरीका लागि सबैभन्दा महत्वपूर्ण सूचना हो। त्यही फिल्डबाट आउने कच्चा सूचनालाई केलाएर, त्यसको सम्बन्ध जालोहरु जम्मा पारेर, अन्तबाट जानकारी लिनुपर्ने भएमा सूचना लिएर विश्लेषण गरेपछि नै एउटा तस्बिर बन्छ, ए यस्तो रहेछ भनेर।
त्यसैले फिल्डमा जुन प्रहरीको बलियो सम्बन्ध हुन्छ ऊ सूचनाको खानी नै हो। दिवस त्यस मानेमा सूचनाको खानी नै थिए। अपत्यारिला सूचनाहरु आइरहन्थे उनलाई। यस्ता धेरै केस छन्। यो अंकमा त्यसमध्ये २ वटा उल्लेख गर्छु है त।
