राष्ट्रिय प्रजातन्त्र पार्टीको निर्वाचन समितिले चुनावको अन्तिम नतिजा सार्वजनिक नगर्दै अध्यक्ष पदका उम्मेदवार बनेका कमल थापाले मंसिर १९ गते पूर्वराजा ज्ञानेन्द्र शाहसँग सार्वजनिकरुपमा आक्रोश पोखे । आफूलाई चुनाव हराउन निर्मल निवास लागेको र त्यसको नतिजास्वरुप राजेन्द्र लिङ्देन अध्यक्षमा विजयी भएको उनको आरोप थियो ।
थापाको यो अभिव्यक्तिले राप्रपाभित्र मात्रै होइन, राजनीतिक वृत्तमै तरंग ल्याइदियो । अहिले पनि थापा आफ्नो अडानमा कायम छन् र यो प्रकरणमा पार्टीले छानबिन हुनुपर्ने माग गर्दै आएका छन् ।
कमल थापाकै शब्द सापटी लिएर भन्नुपर्दा सिंगो मुलुक गणतन्त्रमय भएका बेला शीरमा कफन बाँधेर २०६३ सालदेखि राजसंस्था बोकेर हिँडेका थिए, कमल थापा । कठिन र चुनौतिपूर्ण समयमा राजसंस्था बोकेको भए पनि पार्टी एकताको महाधिवेशनसम्म आइपुग्दा आफूलाई निर्मल निवासले धोका दिएको बुझाइ थापाको थियो ।
कतिपयले निर्मल निवाससँगको सम्बन्धमा दरार आउँदाको नतिजास्वरुप थापाबाट यो अभिव्यक्ति आएको भनेका छन् । यो अभिव्यक्तिले व्यक्तिगत रुपमा थापालाई कति फाइदा होला वा घाटा ? पार्टीको आन्तरिक समीकरणमा कस्तो असर पुग्ला ? थापाको अभिव्यक्तिलाई उनी पक्षकै नेताले कसरी लिएका होलान् ? प्रश्न सतहमा रहेको छ ।
