यसपटक म पनि राष्ट्रिय जनगणना कार्यक्रम २०७८ को गणक बन्ने अवसर पाएँ। खुसीको कुरा आफ्नै गाउँ सिन्धुपाल्चोकको इन्द्रावती गाउँपालिका वडा ४ मा गणक बनें। वडा ४ पहिले नवलपुर गाउँ विकास समिति हो। यही गाविसको साबिक ६ र ७ वडाका १३५ घरको तथ्यांक संकलन गर्नु मेरो जिम्मेवारी।
मंसिर २५ गते बिहान साढे ६ बजे ८० वटा प्रश्न भएको फारम बोकेर निस्के कैजले। साथमा जनगणना कार्यक्रमको परिचयपत्र, केही किताब थिए झोलामा। कलम त छुट्याउने कुरै भएन। सवारी साधन पुग्ने सडक भएपनि सवारी नचल्ने भएकोले ३० मिनेटमा पैदलै कैजले पुगे, अनि थालेँ काम।
शिवप्रसाद सापकोटाको विवरण सबैभन्दा पहिले लिएँ। इन्द्रावती गाउँपालिकाको केन्द्र नवलपुरमा कात्तिक १३ देखि १६ गतेसम्म तालिम लिएकाले विवरण लिन खासै अप्ठेरो परेन। सायद नेपालीभाषी र बाहुन परिवार भएकोले पनि होला सजिलो हुनुको कारण। अर्को चिनजानले पनि साथ दियो। २० देखि ३० मिनेटभित्र यहाँका घरहरुको विवरण भर्दै गए।
